Icelandic

Vörumerkið Icelandic hóf göngu sína sem gæðamerki fyrir íslenskt sjávarfang

Undir merkinu hefur verið byggð upp þekking og dýrmæt tengsl við markaðs­setningu erlendis. Vörumerkið er með sterka stöðu á alþjóðavísu, hefur tengsl við íslenska náttúru, gæði og lifandi sögu. Mikil vinna hefur verið lögð í að útvíkka vörumerkið Icelandic svo það geti stutt við ýmiskonar starfsemi. Því er ætlað að verða gæðamerki fyrir íslenskar vörur á erlendum markaði. Íslenskir fram­leiðendur sem hyggja á útflutning geta nýtt sér þá miklu þekkingu og reynslu sem safnast hefur saman í kringum vörumerkið Icelandic að uppfylltum vissum skilyrðum.

Með því að tengjast Icelandic vörumerkinu stendur m.a. til boða:

• Aðstoð við vörumerkjaskráningu erlendis
• Hjálp við markaðssetningu á breiðum grunni
• Aðstoð við uppbyggingu orðspors og gæðastjórnunar
• Aðgangur að Icelandic gæðahandbókinni og þrautreyndum
  gæðastýringaraðferðum

Grunnur Icelandic

Hugtökin íslenskt og Íslendingur eru mótuð af nánd við fagra en um leið hrjóstruga náttúru, stór og eldspúandi fjöll, ár og læki af öllum stærðum, jökla og úfin hraun. Óblíð náttúruöflin láta iðulega finna fyrir sér, alltumlykjandi hafið í kringum eyjuna okkar hefur gefið og tekið í gegnum aldirnar. Þessi bakgrunnur er okkar sameiginlegi þráður þó við upplifum hann og landið okkar hvert á sinn hátt.

Það er greypt í þjóðarsál okkar að vera vandvirk, útsjónarsöm, harðdugleg, nýtin og stolt. Öðruvísi er ekki hægt að komast af í þessu harðbýla landi. Persóna og tónn Icelandic vörumerkisins er mótuð af íslenskri náttúru, lífsbaráttu okkar og sögu í gegnum aldirnar.

Úr þessu hrjúfa umhverfi eru hornsteinar vörumerkisins Icelandic sprottnir.

Náttúrulegt

Í sátt við náttúruna og umhverfið

Trú uppruna okkar

Við byggjum á sögu og virðingu við auðlindirnar

Traust og heilindi

Við erum hreinskiptin, vinsamleg en gerum engar málamiðlanir um vöruvöndun

Óaðfinnanleg gæði

Viðskiptavinir geta treyst gæðum þeirrar vöru sem merkt er Icelandic

Persóna og tónn vörumerkisins byggir á tengslunum við íslenska náttúru, lífsbaráttu okkar og sögu í gegnum aldirnar.

Hvers vegna Icelandic?

Vörur sem bera Icelandic-merkið eru „fulltrúar hreinleika“, þær eru íslenskar hágæðavörur með mikla sérstöðu og framleiðsla þeirra er háð lögmálum um sjálfbærni og samfélagslega ábyrgð. Þess vegna þurfa þeir framleiðendur sem vilja nota sér merkið að rísa undir þeim kröfum.

Hreinleiki – Íslenskt – Gæði – Sjálfbærni